LAOAG CITY – Mangiyuswat ti kamara de representantes ti special hearing intono miyerkules, Marso 9 mainaig iti agtultuloy a panagngato ti presyo dagiti produkto a petrolyo.
Daytoy ti inbatad ni Albay Representative Joey Salceda, ti chairperson ti Committee on Ways and Means.
Segun ken ni Salceda, pagsasaritaan da iti maiyuswat nga special hearing ti impact ti agtultuloy a panagngato ti presyo ti petrolyo iti inflation, trade ken commodity kasta pay iti biang ti agrikultura.
Malaksid iti daytoy, kuna ni Salceda a pagsasaritaan da pay ti impact na iti supply ken demand, iti transport sector, pakairamanan ti fuel excise tax ken dadduma a taxes.
Mainaig iti daytoy, inpakaammo ni Salceda nga inbilin ni Speaker Lord Allan Velasco iti House committees on Economic Affairs, Energy, Transportation ken ti Committee on Ways and Means a mangbukel ti Fuel Crisis Ad Hoc Committee a mangiwanwan iti maiyuswat nga aktibidad.
Kabayatanna, inbatad ni Salceda a dagiti mailunglungalong a temporaryo a pannakasuspenso ti fuel excise tax ket possible nga ikonsiderar da kabayatan ti panagdengngeg.
