LAOAG CITY – Target ti kamara de representantes nga aprubaran ti nailungalong a gakat a sinertipikaran kas urgent ni President Ferdinand Marcos Jr. a mangipaay kenkuana ti bileg a temporary a kissayan wenno masuspenso ti excise tax kadagiti produkto a petrolyo tapno masolbar ti panagngato ti presyo ti langis.
Iti babaen ti House Bill 8418, mabalin nga ipatungpal ti president ti panagkissay wenno pannakasuspenso ti buwis iti gasoline ken dadduma pay a fuel products no adda ti nakaro a panagngato ti presyo ti langis iti world market wenno iti panawen ti national emergency.
Segun ken ni House Majority Leader Ferdinand Alexander ‘Sandro’ Marcos, gagem ti gakat a dagus a maipaay ti pakalag-anan ti publiko sakbay a ngumato ti plete, presyo ti makan ken dadduma pay a paggastusan.
Mabalin nga ipatungpal ti tax relief no ti average a presyo ti Dubai crude oil ket umabot wenno aglabes iti $80 ti kada bariles iti uneg ti maysa a bolan, wenno adda ti naideklarar a national emergency a nangitunda ti dakkel a panagngato ti presyo ti langis.
Nailawlawag iti gakat a ti pannakasuspenso wenno panagkissay ti buwis ket agingga iti innem a bolan laeng, ken saan a lumabes iti pakabuklan a maysa a tawen,ken mabalin nga usaren ti president ti bilegna agingga iti Disyembre 31, 2028.
