LAOAG CITY – Ilunglungalong ni House of Representatives ti pannakaamendar iti Rice Tariffication Law tapno makailako ti National Food Authority rice iti tiendaan.
Daytoy ti inpakaammo ni Speaker Martin Romualdez.
Inbatadna a manarimaan ti pannakatratar ti Committee on Agriculture and Food iti panangidaulo ni Rep. Mark Enverga dagiti ar-aramiden a pannakabalbaliw iti nasao a linteg.
Inlawlawagna a saanda nga i-repeal ti Rice Tariffication Law ni di ket sumagmamano laeng a pannakabalbaliwna.
Gagem daytoy tapno maikkan ti abot-kaya a presio ti bagas para kadagiti umili nangruna ket agtultuloy a ngumatngato a presio dagiti kangrunaan a magatgatang.
Kunana a target a maamendaran ti Rice Tariffication Law sakbay nga agngudo ti adjournment ti Kamara iti masungad a Mayo 24.
Ti kalikagum a pannakaamendar ti Rice Tariffication Law ket tapno makalako ti bagas ti National Food Authority iti merkado publiko.
Ilunglungalong ti Kamara a mailako ti 20 a pisos iti kada kilo ti National Food Authority rice iti merkado tapno dakkel a pangnam-ayan dagiti naruay a gumatgatang a Pilipino.
Aminado ti Speaker a kalikagum met ni Presidente Ferdinand Marcos Jr. nga ipababa ti presio ti bagas iti kabaelan dagiti umili a gatangen.
Karaman kadagiti aramiden nga amendments ket ti taxes, taripa ken panaggatang ti National Food Authority iti babaen ti Department of Agriculture nga iti agdama ket adda ti limitasionna.
Inallukoy pay ti Speaker dagiti kakaduana iti Senado nga aramideng nga urgent ti aramidenda a panangamendar tapno malag-ananda ti presio ti bagas manipod iti National Food Authority.
