LAOAG CITY – Sumurot ti Kamara iti pammilin ti Korte Suprema nga agisubmitir ti nayon nga impormasion mainaig iti sangsangoen nga impeachment case ni Vice President Sara Duterte.
Basar iti pannakangiwat ti House of Representatives a ni Atty. Princess Abante, naawaten ti Kamara ti resolusion ti Korte Suprema maipanggep iti daytoy ken nai-refer-dan iti Office of the Solicitor General.
Ti addang ti Korte Suprema ket kas sungbat iti inpila a petision ni Vice President Sara ken ti abugadona a ni Atty. Israelito Torreon a mangkukuestionar iti constitutionality ken proseso ti impeachment proceedings nga addan iti biang ti Senado.
Inpasingked ni Abante ti naiget a pannakikoordinarna iti Office of the Solicitor General a tumaktakder kas counsel ti Kamara iti kaso.
