LAOAG CITY – Rinatipikaranen ti Kamara de Representantes ken Senado ti bicameral conference committee report para iti P6.7-trilyon a national budget intono 2026.
Agpada a rinatipikaran ti Kamara ken Senado ti budget para iti 2026 ita nga aldaw, Disyembre 29, 2025.
Immuna iti daytoy, ti bicameral report ket pinirmaan dagiti mangibagi manipod iti dua a pagpandayan linteg iti kongreso idi Disyembre 28, 2025 iti PICC, Pasay City.
Kalpasan ti ratipikasyon, ipatulod ti enrolled bill iti Malacañang para iti panangpirma ni Presidente Ferdinand Marcos Jr. intono Enero 5, 2026.
Daytoyen ti kadakkelan a budget iti pakasaritaan ti pagilian a gagem na a pondoan dagiti kangrunaan a programa iti imprastruktura, edukasyon, ken social services.
Nupay kasta, sumagmamano nga agpanpanday linteg ti nangirakurak ti panagamak da iti maipagarop a “pork barrel” a naipalaon iti unprogrammed appropriations.
Iti baet daytoy, inpasigurado ti liderato ti Kongreso nga ad-adda a nagbalin a silulukat ti proseso ita a tawen gapu iti live-streaming ti bicameral deliberations.
Ti alisto a ratipikasyon ket mangipakita iti panagkalikagom ti lehislatura a masigurado nga agtultuloy ti operasyon ti gobierno iti panangrugi ti 2026.
