LAOAG CITY – Kumpiansa ti dua a lider ti Kamara nga awan ti makita ti Korte Suprema a blangko wenno aniaman nga iregularidad iti enrolled bill ti 2025 national budget pakairamanan ti kopya ti General Appropriations Act a pinirmaan ni Presidente Ferdinand Bongbong Marcos Jr.
Daytoy ti inrakurak da House Assistant Majority Leaders Representatives Jude Acidre ti Tingog Party-list ken Jil Bongalon ti Ako Bicol Party-list kalpasan nga inbilin ti Supreme Court ti panangisubmitir kadagiti nadakamat a dokumento.
Mainaig iti daytoy, kadagiti petision a naipila para iti pannakapatibker ti nailian a pundo ita a tawen.
Inbatad ni Acidre a napinpintas no kiddawen ti Korte Suprema dagiti nasao a dokumento tapno makita mismo dagiti mahistrado ken isuda ti makapaneknek nga awan ti blangko iti 2025 national budget.
Nagtalinaed met ti takder ni Bongalon a ti 2025 national budget ket valid, lawful ken binding.
