LAOAG CITY – Mangipaay ti P3 milyon a reward ti House of Representatives (HOR) ken ni Carlos Yulo gapu ta nakagun-od ti gold medal iti 2024 Paris Olympics.
Daytoy ti kinumpirmaran ni House Committee on Appropriations Chairman ken Ako Bicol Partylist Rep. Elizaldy Co.
Segun ken ni Cong. Zaldy Co, inpakita ni Yulo ti dedikasionna ken hard work tapno maikkan ti pammadayaw iti pagilian.
Inbatadna nga inpakita ni Yulo ti determinasion ken resilience a kabaelan ti Filipino nga ag-excel ken magun-od ti pakasaritaan iti aniaman a tay-ak.
Napaneknekan ni Yulo a kabaelan dagiti Pinoy a makiggidan iti intero a lubong.
Ni Yulo ti kaunaan a Filipino gymnast a nakagun-od ti gold medal iti men’s floor exercise iti 2024 Paris Olympics a naiyuswat iti Bercy Arena.
Isuna pay ti immuna a medalist iti kampania ti Pilipinas iti Paris ken ti maikadua a gold medalist manipud iti pagilian kagiddan ti weightlifter a ni Hidilyn Diaz a nangabak ti balitok a medalya para iti weightlifting iti 2020 Tokyo Olympics.
Inrakurak met ni Yulo a ti panagballigina ket isagutna kadagiti amin a kadaraanna a Pilipino.
Kabayatanna, ni Yulo ket maaddaan ti baro a shot iti Olympic medal inton Domingo no sumabak isuna iti vault finals.
