LAOAG CITY – Inpasigurado ti Kamara a saan daytoy a makibiang iti imbestigasion iti maipagarup a maanomalya a flood control projects no bilang adda ti mairaman a kongresista.
Inbatad ni Bicol Saro party-list Rep. Terry Ridon, Chair ti House Committee on Public Accounts, otomatiko nga agsardeng ti panel-na no adda ti agpanpanday linteg a mainaganan iti baet ti panangtingiting.
Inlawlawagna a saan nga agsardeng iti sibubukel a tri-committee iti trabahoda no diket agsardeng laeng iti partikular nga inquiry no sadinno nga adda ti opisial a nairaman.
Naammoan a ti tri-committee ket bukbuklen ti komite iti Public Accounts, Public Works ken Good Government.
Maiyur-uray pay laeng ti pammalubos ti plenario sakbay a rugian ti panagdengngeg.
Kagiddan iti daytoy, naminsan manen nga inallukoy ni Ridon ni Baguio City Mayor Benjamin Magalong nga agisubmitir ti impormasion apaman a mangrugin dagiti panagdengngeg.
Maipalagip nga inbutaktak ni Magalong nga adda dagiti sumagmamano a kongresista ti maipagarup nga agaw-awat ti 30% agingga iti 40% kickbacks manipud kadagiti infrastructure projects pakairamanan ti flood control.
