LAOAG CITY – Suportaran ti House of Representatives ti plano a panagggatang ti gobierno ti 20 a baro nga F-16 fighter jets idiay Estados Unidos a napateg a paset ti modernization program ti Armed Forces of the Philippines (AFP) tapno ad-adda pay a papigsaen ti nailian a depensa ti pagilian.
Segun ken ni House Assistant Majority Leader ken Tingog Party-list Rep. Jude Acidre, iti kinabayagen ti modernization plan ti Armed Forces of the Philippines, saanen a baro ti plano a panaggatang ti baro a fighter jets a gagem a papigsaen ti depensa ti teritorio ti pagilian ken sangoen dagiti pangta iti seguridad.
Inbatadna a ti nalawlawa a kinapateg ti panangpapigsa ti kabaelan ti Armed Forces of the Philippines.
Iti kallabes, inaprobaran ti United States State Department ti panaglako ti 20 F-16 fighter jets iti Pilipinas a mapattapatta nga agbalor ti $5.58 bilyon.
Daytoy nga addang ket kas paset iti gagem ti Pilipinas nga i-modernize ti air force kagiddan ti panangpapigsa ti koordinasion daytoy kadagiti kaalyado a pagilian.
Inrakurak ti Department of National Defense ti plano daytoy a mangala ti long-term loan manipud idiay Estados Unidos tapno pundoan ti nasao nga acquisition kas pammaneknek ti panangikagumaan ti administrasion a papigsaen ti kabaelan iti depensa iti baet ti kinakurang iti pundo.
