LAOAG CITY – Inpasigurado ni House Speaker Faustino “Bojie” Dy III a trataren ti Kamara ti pagalagadan mainaig iti panangipublikar ti Statements of Assets, Liabilities and Net Worth (SALN) dagiti agpanpanday linteg para iti transparency.
Segun kenni Dy, silulukat kadagiti miembro ti Kamara iti ideya ken trataren da daytoy iti pormal a panawen.
Ti rakurak ti Speaker ket kalpasan ti pammilin ni Ombudsman Jesus Crispin “Boying” Remulla a malukatan ti access iti publiko ti SALN dagiti opisyal ti gobyerno.
Basar iti direktiba, mabalin nga agkiddaw ti kopya ti publiko iti uneg ti 19 nga aldaw manipud iti panangisubmitir na, laketdi makaluban ti sensitibo a personal nga impormasyon.
Kuna pay ni Remulla nga agkiddaw ti kopya ti SALN manipud iti Senado ken Kamara.
Mainaig iti daytoy, inbatad met ni Dy a datin a nakalukat iti publiko ti SALN dagiti agpanpanday linteg ken rumbeng a maisubli ti kastoy a sistema.
Kabayatanna, inpasigurado na a no kasapulan nga isuna ti mangiyuna iti panangipakita ti SALN na ket isu ti aramiden na.
