LAOAG CITY – Sakripisyo ken suporta ti nagannak.
Daytoy ti nagbalin nga inspirasyon dagiti kambal a Desi Rose ken Desi Lhyn Tagama iti Brgy. 3 iti ili ti Sarrat tapno makapasa iti Nurse Licensure Examination ita a tawen.
Segun ken ni Desi Rose, ado ti sakripisyo ti nagannak kadakuada tapno laeng makapagturpos da iti panagadal kangrunaan iti kurso a nursing.
Immuna iti daytoy, inlawlawag dagiti kambal a sakbay ti eksaminasyon ket naiget a panagreview ti inaramid da kageddan ti ad-adda a panangdayaw iti namarsua.
Inpakaammo dagitoy nga arig a nakarkaro ti panagbuteng ken danag a narikna da idi nalpas ti eksaminasyon agsipod ta maiyur-uray ti resulta daytoy.
Kuna da a karaman a karit kadakuada kas kambal ket nu adda ti maysa a mapaay a makapasa.
Nu pay kasta, inbatad dagiti kambal a kalpasan ti naunday a panawen ken ado a rigat ket napagasatan da a makapasa ken agbalin a naan-anay a rehistrado a nurse.
Kabayatanna, inpakaamo dagiti kambal a plano da ti agtrabaho pay laeng ditoy probinsya para iti nayun a kapadasan sakbay nga agpaay dagitoy iti sabali a lugar.
Agpada nga inbaga dagiti kambal a ti laeng tulbek kadagiti dumalan iti eksaminasyon ket saan nga agpannurray ti pressure ngem ketdi ad-adda nga agtalinaed a positibo ken kalmado.
