LAOAG CITY – Inbatad ni Fire Chief Inspector Roxanne Parado, ti provincial fire marshall iti Bureau of Fire Protection (BFP) ditoy probinsya a nakalockdown ti fire station iti ili ti Nueva Era kalpasan a nagpositibo iti RT-PCR test dagiti tallo a personnel iti nasao nga opisina.
Inlawlawag ni Parado a ti immuna a nagpositbo ti RT-PCR test ket ti maysa a personnel da a saan pay a pulos a nabakunaan kontra iti makapatay a virus.
Inbatad na a gapu ta saan a kayat ti maseknan a personnel da ti agpabakuna ket naibilin a kada dua a lawas ket agpa-RT-PCR test.
Nupay kasta, sakbay a dimmalan iti RT-PCR test ket napan nagduty nga immuna no sadinno nga idi rimuar ti resulta na ket positibo daytoy.
Gapu iti daytoy, dimmalan amin a covid-19 test dagiti kakadwa na iti BFP-Station iti ili ti Nueva Era ken tallo pay kadakuada ti nagpositibo isut gapuna a nailockdown ti nasao nga opisina.
Mainaig iti daytoy, inbatad ni Parado a nangisumitir dan ti palawag iti higher office da pakaseknan iti nasao a pasamak ken urayen da no rumbeng a sumango ti kaso administratibo ti personnel iti BFP-Nueva Era gapu iti panagkedked na nga agpabakuna kontra iti covid-19 virus.
Immunan nga inrakurak ni Parado a ti immuna a nagpositibo a personnel ti BFP ti kakaisuna a saan pay a nabakunaan kontra iti covid-19 gapu ta maipagarop a mailabsing iti relihiyon da.
