LAOAG CITY – Naglikudan ti kameng ti Civil Security Unit (CSU) a ni Mr. Cirilo Japz Mateo ti alegasyon kenkuana a maipagarop a pinagsasawan na ti maysa a tenant ti “Chowking” iti pwesto da iti pagpiyestaan ditoy ciudad ti Laoag.
Malaksid iti daytoy, maipagarop a nabartek pay ni Mateo idi napanna pinagsasawan ti maseknan.
Iti interview ken ni Mateo, inlawlawag na saanna a pinagsasawan ti tenant no di ket binalakadan ken binallaagan na laeng daytoy kalpasan a namin-ado a daras a naaktwan na ti panagibelbelleng na kadagiti basura da iti under pass.
Inbatad na a gapu ta arigna saan a pulos a dumdumngeg kenkuana ti maseknan ket naibaga na pay a mabalin a mapaserraan ti pwesto dagitoy.
Innayon na nga imbes nga agtungpal ti maseknan ket maipagarop a daytoy pay ti nagbalin a nabara kenkuana.
Mainaig iti daytoy, kalikagom ni Mateo a maimbitaran ti vlogger a nangipost kenkuana iti facebook tapno malawlawagan ti isyu ken madalusan ti nagan na.
