LAOAG CITY – Naarestar ti maysa a kameng ti Department of Public Safety (DPS) iti naiyuswat a drug buy-bust operation babaen kadagiti kameng ti Provincial Drug Enforement Unit (PDEU) iti Barangay 11 ditoy ciudad ti Laoag.
Nabigbig daytoy a ni Simplicio Bongbong Manuel Jr., kameng ti DPS ken residente iti Barangay 55, Barit ditoy ciudad ti Laoag.
Segun ken ni Police Chief Master Sergeant Harold Nicolas, ti mangidadaulo ti PDEU, nakakumpiskar da ti 19 a babassit a sachet a naglaon ti maipagarop a shabu iti ikot ni Manuel, pakairamanan ditoyen ti maysa a sachet a maipagarop nga inlako ti suspek iti nagpammarang a poseur buyer, sangaribo a pisos a nausar iti operasyon ken ti maysa a kutsilyo.
Inbatad ni Nicolas a karaman iti drug watchlist ditoy probinsya ni Manuel idi pay 2016 ken maibilang pay nga High Value Indibidual (HVI) kas empleado ti gobierno.
Inlawlawag ni Nicolas a sakbay ti lockdown ket addan dagiti namonitor da a dakkel a suplay ti maipagarop a shabu a simmangpet ditoy probinsya.
Nupay kasta, kuna ni Nicolas a saan da a naikkan ti gundaway a nang-neutralize isut gapuna a dagitoyen ti maiwarwaras iti agdama.
Innayon na nga adda pay dagiti maaw-awat da nga impormasyon nga adda manen dagiti agsangpet a suplay kalpasan a naipan ti probinsya iti General Community Quarantine (GCQ).
Inpakaammo ni Nicolas nga idi 2016 ket kinasarita na ni Manuel a sumuko ngem naglikudan na nga adda ti illegal nga aktibidad na, ngem idi 2019 ket rimuar manen ti nagan na a positibo iti nasao nga illegal nga aktibidad.
Kuna na nga isayangkatan da koma ti operasyon sakbay ti ECQ ngem saanen a nakarwar dagiti police assets da, ngem itay laeng bigat ket naikkan dan ti gundaway.
Kabayatanna, nagkedked a nagpainterview ni Manuel iti Bombo Radyo Laoag ngem naibaga na a day-off na ita nga aldaw ken napan nagpachange oil iti pagtarimaanan ti motorsiklo idi kellaat lattan a ginammatan dagiti kameng ti PDEU ken adda lattan dagiti inruwar da a sumagmamano a sachet a maipagarop a naglaon ti shabu iti lamisaan.
