LAOAG CITY – Nagviral ti komento ni Sang Bayan Member Nomer Agulay iti ili ti Solsona kontra kadagiti kameng ti Philippine National Police (PNP) nga agisaysayangkat ti checkpoints iti pannakaipatungpal ti Enhanced Community Quarantine gapu iti covid-19.
Iti komento ni Agulay iti facebook ket inbaga na nga “isuda koma ngarud ti umuna a maakaran’, a kayat na a sawen ket dagiti koma kameng ti pulisya ti umuna a maakaran ti virus.
Gapu iti daytoy, ado dagiti nangkondenar iti naibaga ti konsehal gapu iti maipagarop a panangilunlunod na kadagiti kameng ti pulisya.
Nupay kasta, iti pannakaisarita kenkuana ti Bombo Radyo Laoag ket inlawlawag na a saanna nga intensyon nga ilunod dagiti kameng ti pulisya.
Inlawlawag na a gapu ta adda ti pammilin ti PNP-regional Office a maikkaten dagiti barangay checkpoints ket dagiti laengen kameng ti pulisya.
Innayon na a kayat na a sawen ti komento na ket dagiti kameng ti pulisya ti umuna a maakaran ti virus gapu ta isuda laengen ti mangisayangkat ti checkpoints.
Nagpadespensar metten ni Konsehal Agulay babaen ti panagpost na iti facebook account na.
