LAOAG CITY – Balligi a naarestar ti maysa a kameng ti Lesbian, Gay, Bisexual, Transgender and Queer wenno LGBTQ Community babaen iti naiwayat nga Anti-Illegal Drug Buy-Bust Operation iti Brgy. Macayepyep iti ili ti Banna.
Segun ken ni P/Capt. Ashley Cacayorin, Hepe ti Banna Municipal Police Station, nabigbig ti subject ti operasion a ni Christian Tutaan y Academia, agtawen iti 40, awanan asawa, municipal coordinator of Volunteers of Philippinism ken residente iti nasao a barangay.
Inbatadna a dagus a tiniliw dagiti otoridad ti nasao a subject ti operasion kalpasan a naglako ti maysa nga heat sealed transparent plastic sachet a naglaon ti maipagarup a shabu iti maysa a pulis a nagpammarang a poseur-buyer.
Nakumpiskar dagiti otoridad manipud iti suspek ti pito nga heat sealed transparent plastic sachet a naglaon ti maatap a shabu nga agdagsen ti sumurok-kumurang dua a gramo nga agbalor iti 13,600 a pisos.
Malaksid iti daytoy, iti panangkapkap dagiti otoridad ken ni Academia ket naalada ti dua a pedaso ti 50 a pisos a kuarta, 12 a pedaso ti one peso coin, dua a pedaso ti five peso coin, maysa a pedaso ti ten peso coin, dua a nangisit a pitaka a nakaipanan ti kuarta ti suspek ti operasion.
Innayonna a ti nasao a suspek ket maibilang nga Street Level Individual ken rumrummuar ti naganna nga adda ti pakainaiganna iti iligal a droga.
Mainaig iti daytoy, inpetteng ti nasao a suspek a naipabulsa laeng kenkuana dagiti naala a kontrabando a mapapati a shabu.
Inlawlawagna a mapan laeng koma gumatang isuna ti softdrink iti maysa a tiangge ngem kabayatan a gumatgatang iti softdrink ket adda ti immasideg kenkuana a patienna a maysa a kameng ti pulisia a ninagananna ti Mr. Abian.
Inpalgakna a drug sureenderre daytoy idi tawen 2018 ken nabayagen nga insardengna ti panagikot iti iligal a droga.
Kabayatanna, kuna ni Brgy. Kagawad Allan Simogan iti Brgy. Macayepyep iti ili ti Banna nga awan met ti pakaidamdamagan ti kabaranggayanna a maikanniwas iti paglintegan.
Inlawlawag met ni Ms. Cristine Academia Francisco, kabsat ti subject ti operasion a nasaayat ti kabsatna ken awan ti nakairamramanna a pakadaksanna.
