LAOAG CITY – Natay ti maysa a kameng ti Philippine Marines kalpasan a naidungpar iti konkreto a poste ti kuriente iti national highway iti Barangay 5, Davila iti ili ti Pasuquin.
Nabigbig ti biktima a nangiturong ti motorsiklo a Kawasaki ER400D nga agmaris ti puraw a ni Major Noel Anthony Muños Mana-ay, agtawen ti 41 ken residente idiay Carsadang Bago, Imus City, Cavite.
Basar iti Pasuquin Municipal Police Station, agarup 1:40 ti parbangon, kabayatan a dumaldalyasat ti driver ti motorsiklo nga agturong nga agpa-abagatan no sadinno nga idi nakadanon daytoy iti kurbaan a paset ti kalsada ket maipagarup a napukawan ti kontrol ti manibela a nangitunda iti pannakaidungparna iti konkreto a poste ti kuriente.
Gapu iti daytoy, nagsagaba ti sugat iti nagduduma a paset ti bagi ti biktima ken insigida a naitaray iti ospital babaen kadagiti nagresponde a kameng ti Bureau of Fire Protection ken Rural Health Unit iti ili ti Pasuquin para iti naan-anay a pannakatamingna.
Nupay kasta, naideklarar a dead on arrival ti biktima babaen ti attending physician.
