LAOAG CITY – Natiliw ti maysa a pulis gapu iti panagpappaputok na ti paltog iti Sitio Calleseria Brgy 9 San Pedro iti ili ti Paoay.
Binigbig ni Police Lieutenant Marlon Martinez, deputy chief of police ti PNP Paoay, ti suspek a ni Police Corporal Ronald Pastor y Fernandez, agtawen ti 32, awanan asawa, nakaassign iti 2nd Provincial Mobile Force Company, residente iti Brgy. Paratong, Paoay ken tubo iti Brgy. Banuan, Ilocos Sur.
Kuna na a nakaawat da ti tawag iti agarup alas-onse idi rabii nga adda ti nagpaputok.
Inbatad ni Martinez a nakita da ni Pastor a nakaiggem ti atiddog a klase ti paltog ken nagpaputok daytoy.
Segun kenni Martinez, saan da a dagus a nakaasideg kenni Pastor rason a nagkiddaw da iti tulong ti Provincial Mobile Force Company ken iti SWAT Team ti INPPO tapno tumulong nga agresponde.
Inbatad na a naallokoy dagiti otoridad ti suspek a sumuko kageddan ti naiyisyu a Glock pistol kenkuana.
Kuna na a nakarekobre dagiti otoridad ti M16 Armalite nga addan ti serial number EM2802181, bundoler, dua a long magazine ken dua a short magazine, 50 a pidaso iti bala para iti M16, ken maysa a unit ti Glock 9mm pistol nga addaan ti serial number a PNP 24016, dua a magazine, ken 20 a bala a 9mm.
Umabot met iti 48 a kapsula ti caliber 5.56 a bala dagiti narekobre dagiti kameng ti Scene of the Crime Operatives.
Iti inisyal nga mimbestigasyon, inbunannag ni Martinez a sakbay ti insidente ket adda dagiti ubbing a nagriri ken maipagarup a rimmaman ti kabagyan ngem awan ti napasamak a panagririri.
Kuna na a napan napan nakiinom ni Pastorket dita a maipagarup a naasuten ti rikna na tapno agprobokar.
Inbatad na nga iti kallabes ket adda dagiti report da panggep iti riri ti pamilya ngem saan a nakaro.
Innayon ni Martinez a maisagsaganan ti maipila a reklamo nga alarm and scandal.
