LAOAG CITY – Kinumpirmaran ni Barangay Chairwoman Alicia Bonoan iti Barangay Balacad ditoy ciudad ti Laoag a negatibo ti resulta ti swab test ti kabarangayan da a kameng ti Philippine National Police (PNP).
Segun kenni Bonoan, naamoan na ti resulta babaen kadagiti kameng ti City Health Office (CHO).
Inbatad na a nupay negatibo ti resulta ti swab test ti kameng ti PNP ket masapol latta nga ileppas na ti 14-day quarantine iti pagtaengan na.
Mangnamnama ti kapitan a babaen iti panag-quarantine ti pulis ket awan ti tumaod a sintomas tapno naan-anayen a mapalukayan dagiti protocol nga ipatpatungpal da.
Maipalagip a na-isolate ti nasao nga indibidwal gapo ta maipagarop a na-expose iti maysa kadagiti nagpostibo iti covid-19 ditoy probinsya.
