LAOAG CITY – Inpakaammo ni Mr. Conrad Martinez, iti Maryland, USA ken tubo iti probinsya ti Pangasinan a kampante da nga awan ti mapasamak a riribok mainaig iti pannakaipatugaw ni President-elect Joe Biden.
Kuna na nga agtalinaed a nakaalerto gapu ta saan na a masinunuo no adda ti mapasamak iti kaaldawan ti inagurasyon ni Biden kas presidente iti Estados Unidos.
Segun kenni Martinez, saan met a naapektaran ti panagtrabaho da nupay nakalockdown ti Washington DC malaksid laeng dagiti agtrabaho iti kabisera manipud iti karruba na nga estado.
Patyen ni Martinez a nasken nga agtalinaed da iti uneg ti pagtaengan agingga a saan a malpas ti inagurasyon.
Kabayatanna, dua laeng a rangtay ti silulukat a mapan iti estado ti Virginia rason a temporaryo a narigat pay laeng ti panagbiyahe.
Innayon ni Martinez a limitado laeng ti makastrek iti Washington DC gapu ti kinaiget ti seguridad kalpasan a naideploy dagiti 25 a ribo a national guards.
