LAOAG CITY – Inpasingked ni Police Executive Chief Master Sergeant Harold Nicolas, ti mangidadaulo ti PDEU ditoy probinsya nga agtultuloy ti kampanya kontra iti iligal a droga ditoy probinsya.
Inbatad na nga ado dagiti agop-operar a drug groups ditoy probinsya.
Daytoy ket kas iti Menrige Drug Group ken ti Rapisora Drug Group.
Inpakaamo ni Nicolas nga addan ti agarup 19 a miembro ti Menrige ti natiliw ken adda laengen ti tallo a saan pay a naiyuswatan ti operasyon kasta pay nga adda iti tallo a saan pay a natiliw a miembro ti Menrige Group.
Mainaig iti daytoy, inbaga ti opisyal a nu pay in-inot ti pannakatiliw dagiti miembro dagiti nasao a grupo, naiget ti panagmonitor ken operasyon ti PDEU gapu ta maibilang nga aktibo pay laeng dagitoy.
Inlawlawag na a malaksid iti Rapisora ken Menrige Group, adda pay iti monitoring ti PDEU ti maysa a dakkel a grupo a saanen nga innaganan pay ti opisyal.
Kabayatanna, inbunannag ni Nicolas a kangrunaan a wagas dagiti drug suspects tapno makaala ti suplay iti sabali a lugar ket babaen ti waybill ken ti panagbiyahe dagiti pribado nga inidibidual manipod Metro Manila.
Immunan nga inpakaamo ni Nicolas a ti kadekkalan a nakumpiskar a gatad ti illegal a droga ket agdagup ti 300 a ribo a pisos manipod iti naiyuswat nga operasyon idi Marso 2020.
