LAOAG CITY – Inpakammo ni Atty. Juanito Antonio, ti legal counsel ni dati a Dingras Mayor Marinette Gamboa a kiniddaw da iti prosecution a maaprubaran ti Petition for Bail para iti temporaryo a pannakawaya-waya ti dati a mayor nga isu ti maak-akusaran nga utek ti pannakapapatay ni dati nga Ilocos Norte Electric Cooperative president Lorenzo Rey Ruiz idi 2009.
Nupay kasta, inbatad na nga inbatad met ti prosecution nga urayen da ti sumaruno nga hearing ken maikkan da ti gundaway gapo ta plano da ti mangipatulod ti subpoena kenni Noel Aureliano, ti nagtestigo iti kallabes ngem inbabawi na met laeng.
Segun kenni Antonio, urayen da ti sumaruno nga hearing intono Nobyembre 14 ngem agdudua no dumatag ni Aureliano ken no man agparang ket imposible nga ibabawi na manen ti testimonya na gapo ta no kastoy ti aramiden na ket luklukwen na metten ti husgado ken nabayagen a kastoy ti maibagbaga a plano ti prosecution.
Ni Noel Aureliano ti nangitudo kenni Gamboa idi nga utek ti krimen no sadinno inbatad na a nangeg na ti maipagarop a panangmandar ti dati a Mayor iti pannakaplano ti pannakapapatay ni Ruiz, ngem inbabawi na met laeng daytoy agingga a nawaya-wayaan ken rumrumuar nga adda ditoy Ilocos Norte.
Inpetteng ni Atty. Antonio a no saan a dumatag ni Aureliano ket pwersaren ti kampo ni Gamboa a mangisyu ti resulosyon para iti inpila da a Petition for Bail gapo ta agtutuok iti pagbalodan ti dati a Mayor ken addaan pay daytoy ti sakit.
Inpalgak na a no ti pagamkan ti prosecution ket aglibas ni Gamboa, saan a mapasamak daytoy gapo ta maysan a senior citizen ken adda ditoy ti negosyo na.
Mainaig iti daytoy, kunana nga iti naiyuswat nga hearing itay bigat ket adda ti inpresentar ti prosecution a testigo partikular ti dua a pulis ken maysa nga abogado ti Public Attorney’s Office a nangasistir kenni Aureliano ken nangipaneknek nga idi 2010 ken bayat nga adda idiay Isabael ti testigo ket intudo na ni Gamboa nga utek ti krimen.
Nupay kasta, inbatad na nga awan met ti kaeskan na daytoy wenno awanan ti probative value tapno maitudo ni Gamboa nga utek ti krime gapo ta amin nga inpresentar ti prosecution nga ebidensya ken saan a natibker ken amin dagitoy ket circumstantial.
Maipalagip a natiliw ni Gamboa idiay Calamba, Laguna idi bulan ti Setyembre ken iti adda ket adda iti kustudiyar ti Bureau of Jail Management and Penology (BJMP) iti cuidad ti Batac.
