LAOAG CITY – Patien ni Atty. Juanito Antonio, ti legal counsel ni dati a Dingras Mayor Marinette Gamboa a patgan ti korte ti Petition for Bail para iti temporaryo a pannakawaya-waya ti dati a mayor nga isu ti maak-akusaran nga utek ti pannakapapatay ni dati nga Ilocos Norte Electric Cooperative president Lorenzo Rey Ruiz idi 2009.
Daytoy ket gapo ta awan met ti maipresentar ti prosecution a testigo a mangipaneknek a ni Gamboa ti utek iti krimen.
Segun kenni Antonio, bayat ti hearing da itay bigat ket saan met a nagpakita ni Noel Aureliano iti laksid a nagpirma iti subpoena nga inpatulod kenkuana ti korte.
Ni Noel Aureliano ti nangitudo kenni Gamboa idi nga utek ti krimen no sadinno inbatad na a nangeg na ti maipagarop a panangmandar ti dati a Mayor iti pannakaplano ti pannakapapatay ni Ruiz, ngem inbabawi na met laeng daytoy.
Kunana nga adda pay ti anak ni Ruiz a ni Atty. Cocoy Ruiz kabayatan ti hearing ngem awan met ti personal nga ammo na iti maibagbaga a pannakaplano iti pannakapapatay ti ama na gapo ta rumrumuar a nagibasar laeng iti sarita ti sabali nga indibidual a mangitudo a ni Gamboa ti nagmandar.
Mainaig iti daytoy, inpetteng na a no saan to pay nga agparang ni Aureliano iti sumaruno nga hearing da intono Nobyembre 21 ken awan dagiti agtestigo ket iruper dan ti panagdesisyon ti huwes iti Petition for Bail ti kampo ni Gamboa.
Inpalgak na a saan a rumbeng nga agtutuok ti akusado iti pagbalodan ti akusado no saan met a mapaneknekan iti alegasyon kontra iti dati a Mayor. Maipalagip a natiliw ni Gamboa idiay Calamba, Laguna idi bulan ti Setyembre ken iti adda ket adda iti kustudiyar ti Bureau of Jail Management and Penology (BJMP) iti cuidad ti Batac.
