LAOAG CITY – Inpetteng ni dati a congressman Rudy Fariñas ken kandidato kas gobernador ditoy probinsya nga ada ti pannakaharass ti kampo na kabayatan ti panagkampanya para iti 2022 elections.
Iti eksklusibo nga interview ti Bombo Radyo Laoag ken ni Fariñas, kuna na a nagturong ti kampo na iti opisina ni Provincial Election Supervisor Joel Gines tapno pormal a maireklamo ti harassment kontra kadakuada.
Segun ken ni Fariñas, maysa iti pannakaharass ti kampo na ket ti kanayun a pannakaiyestablisar ti checkpoint dagiti pulis kadagiti lugar nga asideg ti pagtaengan da nangruna nu agpaawag ti taripnong kadagiti coordinators na.
Kuna na nga arig a kanayun nga agliklikaw iti ruar ti naaladan nga arubayan da dagiti pulis ken adda pay ti gundaway nga adda dagiti napan iti solar da kabayatan ti pannakaiyuswat ti taripnong.
Malaksid iti daytoy, inbatad ni Fariñas a sumagmamano pay kadagiti mayor iti segundo distrito ti probinsya ti saan a mangay-awat iti request letter na tapno mangiyuswat ti campaign rally.
Kuna na a patikular ditoy iti ili ti Pinili, Marcos, Banna ken Dingras.
Gapu iti naming ado daras a panangipatulod na ti request letter kadagiti maseknan a mayor ken saan a napatgan, inyuman na iti COMELEC.
Nu pay kasta, iti naipalubos nga aldaw a panangiyuswat na ti rally ket arig nga isu met ti pannakairana ti pannakaiyuswat ti aktibidad ti LGU partikular iti ili ti Pinili rason nga awan ti natuloy a campaign rally.
Kabayatanna, kuna ni Fariñas a patien na nga adda ti pannakaalarma iti kalaban da a grupo rason nga adda pay dagiti death threat a maaw-awat ti sumagmamano a barangay officials nga adda iti panig na ditoy siudad ti Laoag.
Inpakaamo ni Fariñas nga iti agdama ket addan ti panangiyuman na ti pannakaharass da ken ni DILG secretary Eduarno Año.
Inbatad na a naipadanon na pay daytoy iti Provincial Director ti Ilocos Norte Police Provincial Office a ni PCol. Julius Suriben tapno mapalagipan ti kapulisan.
