LAOAG CITY – Nagpila ti notice of appeal ti kampo ni dati a Presidente Rodrigo Duterte iti Appeals Chamber ti International Criminal Court (ICC) tapno baliktaden ti desisyon ti Appeals Chamber nga i-reject ti interim release wenno temporaryo a pannakawaya-waya ti dati a presidente.
Iti innem a pinanid a dokumento a napetsaan ti Enero 28 nga insumitir ti kampo ni Duterte, kiniddaw da ti dagus a temporaryo a pannakawaya-waya na, iti babaen dagiti kondisyon a mabalin nga ipatungpal ti maysa nga state party ti international court.
Inpetteng ti kampo ti dati a presidente a maipagarop a nagkamali ti Pre-Trial Chamber I mainaig iti saanna a panangikonsiderar ti medical report nga insumitir da.
Basar pay kadakuada, nalawag a nakailanad iti medical report ti agtultuloy a panagkaro ti salun-at ken panagkapuy ti cognitive condition ti dati a presidente.
Inbatad pay ti kampo ni Duterte nga obligasyon ti Pre-Trial Chamber nga ikonsiderar ti nasao a report iti regular a panangtingiting no kasapulan pay nga ituloy ti pannakaibalud ni Duterte iti The Hague.
Maipalagip nga idi Enero 26, nagdesisyon ti Pre-Trial Chamber I nga adda ti umdas a pagibasaran a mabalin paylaeng a makaaramid ni Duterte kadagiti krimen sa sakopen ti hurisdiksyon ti International Criminal Court.
Iti isu metlaeng nga aldaw, inbilang ti chamber a kabaelan pay ni Duterte ti makipaset kadagiti pre-trial proceedings mainaig iti kaso a crimes against humanity a maikonkonektar iti pannakatay dagiti rinibo a Pilipino gapu iti kampanya kontra iti illegal a droga idi daytoy ti mayor iti Davao City ken presidente iti Pilipinas.
Nagkedkedan met ti International Criminal Court ti kiddaw ni Duterte para iti indefinite adjournment.
Kabayatanna, inkeddeng ti korte ti panangrugi ti confirmation of charges hearing ni Duterte intono Pebrero 23, 2026.
