Binabalaw ti legal counsel ni dati a Negros Oriental 3rd District Representative Arnolfo Teves Jr. ti Department of Justice gapu iti panangipalgakda iti mapapati a panagpasuksok ti anak ti dati a mammanday-linteg iti sumagmamano nga otoridad iti Timor Leste tapnu masigurado ti seguridad ti amana.
Segun kenni Atty. Ferdinand Topacio a saan nga usaren ti Department Of Justice, nangruna ken ni Justice Secretary Jesus Crispin Remulla ti News Reports a pangibatayan ti alegasionda.
Inbatadna nga awan serserbina nga impormasyon ti isaksaknap ni Remulla gapu iti hearsay laeng ken awan ti evidentiary value.
Maipalagip a naarestar ni Teves idiay Timor Leste itay nabiit, kalpasan a nangipaulog ti INTERPOL iti Red Notice kontra iti dati a mammanday-linteg.
Sumangsango ni Teves iti adu a kaso ditoy pagilian gapu iti mapapati nga iso ti adda ti likudan iti pannakapapatay ni dati a Negros Oriental Governor Roel Degamo ken siam a dadduma pay.
Karaman ditoy dagiti kaso a murder, frustrated murder ken attempted murder.
Agtultuloy ti pannakitinnulong ti gobierno ti Pilipinas iti Timor Leste tapno mapapartak ti pannakaisubli ni Teves ditoy Pilipinas.
Impanamnama pay ti Department Of Justice a maipaay ti hustisia iti ipapatay ni Degamo.
Kabayatanna, malaksid iti red notice a naipaulog kontra ken ni Teves, na-tag metten daytoy a terorista babaen ti Anti Terrorism Council.
Napapanaw metten ni Teves kas mammanday-linteg gapu iti mapapati a panangipakitana iti dakes a kababalin ken masansan nga absences iti House of Representatives.
Maipalagip a pinadasna met ti nagaplay iti special political asylum idiay Timor ngem saan a naikeddeng daytoy.
Naipadamag met ti aplikasionna para iti Cambodian Citizenship.
Idi napan a lawas, nasipdutan met dagiti kakabagianna a pumanaw iti Timor Leste nga agturong idiay Cambodia.
Segun kenni Mayor Janice Degamo, nasayaat a panagdur-as ti pannakatiliw ni Teves iti kaso ti pannakapapatay ti asawana.
Mangnamnama pay nga asidegen a maisubli iti pagilian ni Teves a sumango kadagiti kasona.
