LAOAG CITY – Pormalen nga inbabawi ti legal defense team ni dati a Presidente Rodrigo Duterte ti request for leave to appeal-da iti maysa a confidential decision ti International Criminal Court (ICC).
Inbabawi ti lead counsel ti dati a Presidente a ni Atty. Nicholas Kaufman ti kiddaw a leave to appeal wenno pammalubos nga agapela maipanggep iti maysa a confidential decision ti International Criminal Court Pre-Trial Chamber I.
Insubmitir ti depensa ti pormal a panangibabawi idi kalman, Marso 16, kagiddan ti maysa nga order manipud iti korte idi Marso 13.
Inpetteng ti depensa a ti panangibabawi ti without prejudice ket kayatna a saoen, mabalin latta nga ipangato ti isyu wenno mangipila ti kapada a kiddaw iti masangoanan.
Ti inbabawi nga apela ket mainaig iti kiddaw ti depensa nga idiskualipikar ti Common Legal Representatives for Victims wenno dagiti abugado dagiti biktima iti kaso nga isuda Atty. Joel Butuyan, Atty. Gilbert Andres ken ti Case Manager-da a ni Atty. Nicolene Arcaina.
Mamati ti kampo ni dati a Presidente Duterte nga adda ti conflict of interest iti panangibagi dagiti nadakamat nga abugado.
Daytoy nga addang ket paset ti agtultuloy a legal battle iti nagbaetan ti depensa ken ti International Criminal Court Pre-Trial Chamber I mainaig iti procedural matters kabayatan nga adda iti kustodiar ti International Criminal Court ti dati a Presidente idiay The Hague, Netherlands.
