LAOAG CITY – Naglikudan ti kampo ni Bamban, Tarlac Mayor Alice Guo nga isuda ti adda iti likudan ti agwarwaras a bidyu nga agpangpangta iti biag da Senador Sherwin Gatchalian ken Sen. Risa Hontiveros nga isuda ti mangim-imbestigar iti Mayor a maipagarup nga adda ti pakainaiganna iti illegal Philippine Offshore Gaming Operators (POGOs).
Inbatad ni Atty. Stephen David ti abugado ti Mayor a maysa a demolition job laeng ti nasao nga alegasion.
Kunana a nagsaritada iti Mayor babaen iti telepono ken inpasingkedna nga adda pay laeng ditoy Pilipinas.
Inlawlawagna a saan nga agat-atendar ni Guo gapu iti nakaro a trauma a mapaspasaranna.
Maipalagip nga inbutaktak dagiti Senador nga adda ti nagwaras a bidyu a maipagarup a mangididiaya ni Guo ti sag-P5 milyon para iti biag dagiti dua a Senador.
