LAOAG CITY – Inbatad ni Atty. Michael Poa, ti pannakangiwat ti kampo ni Vice President Sara Duterte a saan da pay a naan-anay a makapagselebrar uray nagdesisyon ti senado nga i-archive ti articles of impeachment kontra iti bise presidente.
Segun ken ni Poa, iyur-uray da paylaeng ti aniaman a direktiba ti kangatoan a korte ti pagilian.
Maipalagip a nagpila ti motion for reconsideration ti kamara de representantes iti Korte Suprema mainaig iti nasao nga isyu.
Gapu iti daytoy, mamati ni Poa a napateg nga urayen da ti final ruling ti korte suprema iti mosyon ti Kamara de representantes.
Nupay kasta, agtalek da a saanen nga agbaliw ti desisyon dagiti mahistrado gapu ta natibker dagiti argument ti kampo da.
Immunan nga inrakurak ni Senador Marcoleta nga awan ti nadamdamag na a desisyon ti Supreme Court en Banc nga unanimous ken ti saan a nagbayag ket binaliktad da ti bukod da a desisyon.
