LAOAG CITY – Nagtalinaed ti takder ti kampo ni Vice President Sara Duterte nga adda ti karbengan na nga usaren ti amin a legal remedy kontra iti naipila nga impeachment complaint kontra iti bise presidente.
Immunan a kiniddaw ti kampo ti bise presidente iti Korte Suprema a mangiparuk-at daytoy iti temporary restraining order ken writ of preliminary injunction tapno lapdan ti pannagna ti impeachment trial kontra kenkuana.
Segun ken ni Atty. Sheila Sison, ti lead legal counsel ti bise presidente, paset laeng daytoy dagiti legal remedy a mabalin nga aramiden ni Vice President Duterte kas maiyataday iti linteg.
Inkalintegan ti abogado a saan nga ‘absolute’ ti bileg ti kamara de representantes nga aginisyar ti amin a kaso ti impeachment.
Innayon na a masapol a masurot dagiti constitutional standard kas ti wagas ti panagpila ti reklamo, bilang dagiti kasapulan a botos tapno aggunay ti reklamo, one-year constitutional ban, ken dadduma pay.
Binabalaw pay ni Atty. Sison dagiti kongresista a mangdildillaw iti nagbalin nga addang ti kampo ti bise presidente a saan man laeng a mangbasbasa ken mangad-adal ti merito ti naipila a petisyon.
