LAOAG CITY – Inpetteng ti kampo dagiti nangipila ti maikatlo nga impeachment case kontra ken ni Vice President Sara Duterte nga awan ti maris pulitikana ti panangipilada ti reklamo.
Ti grupo dagit padi ken abugado ti nangisubmitir ti complaint iti naglabas nga aldaw wenno sakbay ti bakasion dagiti kongresista.
Inbatad ni Atty. Amando Virgil Ligutan, lead counsel ti grupo, dagiti tattao a nagkakadua para iti impeachment ket dagiti padi a makumikom kadagiti adu a banag ngem iranrantada a birokan ti wagas tapno makaipasa ti petision.
Inpetteng ni Ligutan iti interbyu ti Bombo Radyo, nasken a saan nga ikkan ti maris pulitikana ti impeachment case ken rumbeng a kitaen lattan ti kadagsen dagiti argumento iti kaso.
Gapu iti daytoy, mangnamnamada nga agaramid ti wagas dagiti agpanpanday linteg a paigetan iti reklamo gapu ta seryoso daytoy a banag a nasken a solbaren.
Mamati ni Ligutan a no mangaramid ti wagas dagiti agpanpanday linteg ket kabaelanna a matingiting ken maileppas iti kabiitan a panawen.
Iti agdama, bayat a maisursurat daytoy a damag ket awan pay ti komento ni Bise Presidente Sara Duterte maipanggep iti daytoy a banag.
