LAOAG CITY – Awan ti grupo a naorganisar tapno agpapirma ti kontrata wenno agdawat ti kuarta a membership fee ken agturong da idiay Manila tapno makaawat ti maysa a milyon a pisos manipud iti pamilya Marcos intono Pebrero 2.
Daytoy ti inpetteng ni Mr. Jun Arvin Gudoy, mangidadaulo ti Communications and Media Office (CMO) iti kapitolyo provincial bayat ti pannakiuman ti Bombo Radyo Laoag.
Segun kenni Gudoy, saanen a baro daytoy a sindikato nga agsursursur kadagiti nagduduma nga ili iti probinsya partikular iti ili ti Pasuquin ken Banna.
Inlawlawag na nga agtultuloy ti panangmonitor da iti daytoy a banag ken no maduktalan da ti akin-aramid ket mapilaan ti naan-anay a reklamo dagiti manggungundaway.
Mainaig iti daytoy, kuna ni Gudoy nga adda pay dagiti tattao a nangilako kadagiti dingwen da ken adda ti ummutang ti kuarta tapno adda laeng maited da iti grupo.
