LAOAG CITY – Kinondenar ti maysa a kandidato para konsehal iti ili ti Currimao ti COMELEC Officer a ni Mr. Antonio Guillermo gapu iti maipagarup a saanna a panangipakaammo kadakuada mainaig iti panangalada ti permit iti Office of the Mayor para iti maisayangkat a motorcade.
Segun iti kandidato, ag-motorcade-da koma ngem adda ti nakaibaga kadakuada a masapul ti agsurat iti opisina ti Local Chief Executive rason a saanda a nagtuloy.
Inbatadna a ti ammona ken ti grupona ket ti laeng Philippine National Police ti rumbeng a pakaammoan maipanggep ti gagemda.
Inlawlawagna nga idi damagenna ti nasao a COMELEC Officer babaen ti tawag ket maipagarup a ti insungbatna kenkuana ket inpagarupna a saanda nga ag-motorcade.
Kabatayanna, inpetteng ni Guillermo a naibaga amin dagiti Do’s and Don’ts kabayatan ti naisayangkat a Timpuyog sakbay pay a nangrugi ti local campaign period.
Innayonna a masapul nga ammoda dagitoy a banag tapno maliklikan iti kapada a pasamak.
