LAOAG CITY – Inbatad ni Atty. Joel Ginez, Comelec supervisor ditoy probinsya nga ado pay laeng dagiti nakitkita da a poster ti kandidato iti kina-senador.
Nupay kasta, kunana a ti main office ti agsurat kadagiti maseknan a kandidato nga addaan ti poster a nakabitin iti igid ti kalsada.
Inlawlawag na a no maamoan da a nasuratan dagiti maseknan a kandidato ngem saan a nangtungpal ket mabalin a ground a madiskwalipikar.
Kunana a no adda ti mapaneknekan da a naglabsing ket ireport da iti higher office kageddan ti panagikkat da kadagiti poster a naibitin.
Mainaig iti daytoy, kunana ni Ginez a kas iti dati ket 8 x12 ti size ti leaflets ken iti poster ket 2×3 ti mabalin a rukod dagiti ibitin dagiti kandidato.
Naamoan a dagiti laeng common poster area ti rumbeng a pakaikabilan dagiti poster ken no iti pribado ket nasken nga adda ti pammalubos dagiti agtagikua.
Iti agdama, kuna ni Ginez a makukikom da iti training kadagiti agserbi iti eleksyon kas iti electoral boards, board of canvassers ken dadduma pay.
Innayon na nga iti biang dagiti poster ti local candidates ket saan da pay laeng a garawen gapo ta intono Marso 29 pay laeng ti rugi ti campaign period.
