LAOAG CITY – Maysa a nalatak a dog breeder idiay India ti gimmastos ti 500 million rupees wenno katukad ti P325 million para iti maysa a naisangsangayan a breed ti aso a kombinasion ti wolf ken Caucasian Shepherd.
Ti aso a napanaganan ti Cadabomb Okami ket kadakkelan idiay Estados Unidos sakbay a ginatang ni S. Satish, maysa a nalatak a dog enthusiast manipud iti Bengaluru ken Presidente ti Indian Dog Breeders Association.
Adda ti koleksionna ti sumurok 150 a klase ti aso pakairamanan ti sumagmamano a narigat a sapulen iti intero a lubong.
Inbatad ni Satish, sulit ti nakadakdakkel a gatad ti baro a tarakenna gapu ta maysa daytoy nga one of a kind. Daytoy ket walo a bulan pay laeng ken agdagsen ti 75 a kilo ken adda ti katayagna a 30 a pulgada.
Gapu ta agmaymaysa laeng ti nasao nga aso iti intero a lubong, naruay ti agkalikagum a makakita ken maka-picture ken ni Okami isu a saan a taraken laeng no di ket maysa daytoy a negosio.
Iti kinapudnonan, intugoten ni Satish kadagiti nagduduma nga high-profile events pakairamanan dagiti premiere ti pelikula tapno masubbotna ti puunanna.
Saan daytoy ti umuna a daras a gimmatang ni Satish iti nabalor nga aso.
Iti napalabas a tawen, gimmatang met isuna ti rare a Chow-Chow a kaarngi iti maysa a red panda iti balor a $3.25 million wenno katukad ti P180 million.
Iti pito nga ektaria nga estate-na, banbatayan ni Satish dagiti asona ken maipabpabuya dagitoy kadagiti nagduduma nga events idiay India.
Gapu iti dakkel nga interes ti publiko, makapaspastrek isuna ti $3,000 agingga iti $12,000 wenno katukad ti P170,000 agingga iti P680,000 iti kada event.
