LAOAG CITY – Maibilang a dakkel a karit iti responsibilidad ti agdama a kasasaad ni Princess of Wales Kate Middleton kalpasan ti panangibunannagna iti publiko nga adda ti kanserna ken manarimaan ti preventative chemotherapy daytoy.
Basar iti pannaki-uman ti Bombo Radyo Laoag ken ni Bombo International News Correspondent Greg Pasalodos idiay United Kingdom, dakkel ti panagbalbaliw ti wagas a panagakem kas prinsesa ni Kate gapu iti mapaspasaranna a sakit iti agdama a mangitunda ti panagbalin a limitado ti pannakilangen-langenna kadagiti tattao kangrunaana kadagiti sumupsuporta kenkuana.
Inbatadna a sakbay a naipublikar ti pudno a kasasaad iti salun-at ni Princess Kate ket masansan daytoy nga umas-asideg ken makisarsarita kadagiti umili tapno kumustaenna dagitoy.
Inlawlawagna a nairot pay laeng ti Royal Family a mangiparuk-at ti naan-anay a detalye maipapan iti situasion ti prinsesa nangruna ket narigatan dagiti royal couple a mangilawlawag daytoy a banag kadagiti annakda.
Nupay kasta, kunana a maibasar iti in-post online ni Princess Kate ket pumigpigsa isuna bayat ti panagtulid ti aldaw ken inpanamnamana nga agbalin daytoy a nasayaat iti marikriknana iti kabiitan a panawen.
Innayonna nga adu dagiti nakigtot apaman a naipablaak ti nasao a damag gapu ta saanda met a naripar nga adda ti sagsagabaen a sakit ti prinsesa.
