LAOAG CITY – Inbatad ni Angelic Mateo, agtawen ti 20, composer ti kanta a “Plastik” ken taga Barangay 4 ditoy ciudad ti Laoag a saanna a ninamnama a makastrek iti semi-finalists iti Bombo Music Festival (BMV) 2019 ti inaramid na.
Iti eksklusibo nga interview ti Bombo Radyo Laoag, inbatad na a ti makitkita, maob-obserbaran ken nagbalin a kapadasan na a mismo ti nagbalin nga inspirasyon na tapno mabukel na ti kanta a “Plastik”.
Segun kenkuana, sipud adda ti poot na ket adon dagiti makitkita na nga agpliplinnastic a tattao agingga a dimteng ti gundaway nga isunan a mismo ti naka-eksperiensa.
Inlawlawag na a gapu ti nagbalin nga eksperiensa na ket ditoy a narikna na no kasanu ti kasakit ti makilangen kadagiti plastik a tattao.
Innayon na a mangnamnama a mabaliwan ti saan a nasayaat nga ugali tapno napintas ti panaglilinnangen ken awan dagiti mapasaktan a pada a tao.
Ni Mateo ket katurturpos na laeng iti kurso a BS Nursing iti Mariano Marcos State University (MMSU) idi hunyo ita a tawen.
Inpakaammo na nga adda ti banda da iti pagadalan ken malaksid ti panagar-aramid na ti kanta, ado pay dagiti kabaelan nga usaren nga instrument kas ti piano, ukelele ken gitara.
Kuna na a no mapagasatan a mangatiw iti BMF ket ti kangrunaan a pangisagutan na ti balligi na ket dagiti nagannak na.
