LAOAG CITY – Kinumpirmaran ni Barangay Chairman Larry Alejandro iti Brgy. Cataban ditoy siudad ti Laoag a nakaawat ti surat manipud kenni Mayor Michael Marcos Keon seknan ti panagpalawag na no apay a nairaman a natiliw kadagiti nagsusugal iti barangay na itay kallabes.
Kuna na nga addaan ti 48 nga oras sakbay a makapagsungbat kenni Mayor Keon.
Maipalagip a karaman ni Alejandro a natiliw dagiti kameng ti PNP Laoag seknan iti panagtutupada da.
Immunan a natiliw ni Alejandoro seknan iti panagsugal met laeng iti Brgy. Nangalisan ditoy siudad.
Mainaig iti daytoy, inbatad ni ABC Presidente Mikee Fariñas ditoy siudad nga adda ti nasalungasing ni Alejandro iti linteg.
Kuna na nga iti biang ti kaso administratibo ket awan pay ti nagipila iti daytoy
Nupay kasta, iyur-uray na ti desisyon ti Department of Interior and Local Government kasta pay dagiti nangato nga opisyal iti lokal a gobyerno ditoy siudad.
