LAOAG CITY – Inpetteng ni Barangay Chairman Primo Jay Ramos iti Barangay 23 ditoy ciudad ti Laoag a no kuma nasayaat ti pannakasemento ti kalsada iti paset ti barangay da ket saan kuma a problema ita.
Daytoy ket mainaig iti reklamo dagiti residente a dakkel ti rikki ti nasao a kalsada ken marigatan dagiti agdalyasat a motorista.
Segun kenni Ramos, nasayaat kuma latta ti sitwasyon ti kalsada no napintas ti urban planning idi nasemento ti daytoy iti laksid a dadakkel dagiti dumaldalan.
Inbatad na a gapo iti daytoy ket inpakammo na kenni Engr. Roy Tomas nangruna ket kumarkaro ti dadael ti kalsada, ken kunana a saan da met a mabalin a pawilan dagiti dakdakkel a behikulo a magna iti nasao a kalsada.
Mainaig iti daytoy, kuna ni Ramos a no matarimaan daytoy ket mangrugi iti Vintar road agingga iti Sitio Dungtal.
Inlawlawag na pay a rumbeng nga agtinnulong ti lokal a gobierno ken barangay seknan iti nasao a problema.
Innayon na a makisarita da iti lokal a gobierno tapno maadal no mabalin a mairekep ti dalan wenno maparitan dagiti dadakkel a luglugan a dumalan iti daytoy.
