LAOAG CITY – Pumigpigsa ti kapigsaan a bagyo ita a tawen kabayatan nga umas-asideg idiay Jamaica.
Naruay a Jamaicans ti nagibakwit ngem ti naginad a garaw ti Hurricane Melissa ket nangitunda ti panagdanag ti adu a tattao.
Nagtalinaed ti nasao a bagyo iti category five ken naiget a banbantayan dagiti forecasters iti eksakto a lugar a pag-landfall-an daytoy.
Manamnama a dumuprak ti Hurricane Melissa idiay Jamaica ken southeastern Cuba.
Mainaig iti daytoy, basar iti Foreign Office a nagsardeng ti operasion dagiti eropuerto gapu iti epekto ti bagyo no sadinno a naabisoan dagiti British nationals nga agnanaed idiay Jamaica a sumurot kadagiti pagannurotan nga ipatpatungpal dagiti lokal nga otoridad.
Inpasingked met ni Foreign Secretary Yvette Cooper a mangipaayda ti 24-hour consular assistance ken nakasaritanan ti foreign minister ti Jamaica tapno mangidiaya ti suporta ken tulong manipud iti United Kingdom.
Kabayatanna, inrakurak ni Abka Fitz-Henley, State Minister iti Office of the Prime Minister a namnamaen ti gobierno ti nakaro a pannakadadael dagiti imprastraktura gapu iti kinapigsa ti epekto ti bagyo.
