LAOAG CITY – Inadmitir ni Brgy. Chairman Elviro Agoo iti Barangay Davila iti ili ti Pasuquin a pinawilan na nga aglako dagiti kabarangayan na iti igid ti kalsada.
Daytoy ket gapu ta maipagarop a saan a sursuruten dagiti maseknan dagiti pagalagadan iti pannakaipatungpal ti General Community Quarantine (GCQ) gapu iti covid-19.
Inbatad na nga idi Enhanced Community Quarantine (ECQ) ket pinalpalubusan na latta dagitoy ngem gapu ta saan da latta a sumursurot kadagiti pagalagadan agingga ita a GCQ ditoy probinsya ket pinawilan nan dagiti kalugaran na nga aglako iti igid ti kalsada.
Inpetteng na a no mapatunuynuyan na ti aramid dagiti kalugaran na ket isuna met ti madaksan.
Karaman kadagiti maipagarop a saan a sursuruten dagiti kalugaran na nga aglaklako iti igid ti kalsada ket ti panagsuot ti face mask, social distancing, malaksid pay iti kaado dagiti dumagdagas a tattao a saan da nga am-ammo wenno aggapo iti sabali a lugar.
Inkari ni Agoo a mapan nanto sursuren dagiti kabarangayan tapno kasarita ken ipalagip na dagiti rumbeng nga aramiden da.
Innayon na a possible a palubusan nanto met laeng nga aglako dagiti maseknan ngem ipapaigid danton ti pagpwestoan da saan nga iti mismo a national highway ti pagdudupudupan dagiti ado nga aggatang.
Kabayatanna, inbaga ni Kapitan Agoo nga uray dagiti mangngalap ket binalakadan na a saan da pay laeng a mapan tumaptappog iti baybay a mapan agkalap gapu ta adda met dagiti maipagarop a salsalungasingen da a pagalagadan ti community quarantine.
Kinumpirmaran ni Agoo nga adda dagiti sumagmamano a mangngalap a no adda da iti baybay ken adda ti marana da a barko ket isukat da dagiti makalapan da nga ikan iti dolyar.
Inpakaammo ni Agoo nga idi adda ti napaneknekan da a nangisukat ti nakalapan da nga ikan iti dolyar ket inayaban na dagiti kameng ti PNP ket nadis-infectant dagiti maseknan ken naiquarantine dagitoy ti 15 nga aldaw gapu ta agamak da amangan no adda ti covid-19 ti napanan da a barko.
