LAOAG CITY – Nagikkat iti puesto kas Barangay Chairman ti Barangay Quiling Sur iti siudad ti Batac ni Mr. Alberto Gudoy.
Daytoy ket kalpasan nga indanon ti Bombo Radyo Laoag News Team ti reklamo seknan iti maipagarup nga anomalya nga inaramidna iti proyekto ti barangayda a solar street lights.
Daytoy ti kinumpirmaran ni Barangay Chairwoman Imelda Dela Cruz.
Nakailanad iti reklamo nga adda ti dua a bidder para iti pannaka-instolar ti solar lights a nabigbig dagitoy a ti AB Casiano and Sand Construction Supply ken Nature’s Wealth Trading.
Ti AB Casiano Gravel and Sand Construction Supply ket nag-bid ti 121,125 a pisos idinto a ti Nature’s Wealth Trading ket 180,500 a pisos no sadinno ti napili ti Barangay ket ti AB Casiano Gravel and Sand Construction Supply gapu ta nababbaba ti bid daytoy.
Nupay kasta, rumrummuar a dimmanon iti 179,800 a pisos ti inlatang a pundo ti dati a Kapitan a nangatngato ti 58,675 a pisos manipud iti orihinal a gatad a 121,125 a pisos.
Mainaig iti daytoy, bimmisita ti pannakabagi ti Department of the Interior and Local Government iti Barangay Quiling Sur no sadinno a naipakaammo kadakuada a naka-freeze ti pundo ti barangayda.
Gapu iti daytoy, awan ti makaot nga aniaman a pundo ti barangay para iti pannakaipatungpal kadagiti nagduduma a programa ken proyektoda.
Malaksid iti daytoy, awan pay ti maawat nga honorarium dagiti maseknan nga opisial ti barangay.
Kabayatanna, no mapaneknekan nga adda ti anomalya a napasamak ket maipabaklay kadagiti agdama nga opisial ti mabayadan a gatad tapno mai-lift ti pannaka-freeze ti pundo ti barangay.
Naammoan a nag-resign ti dati a Kapitan idi Enero 21 ita a tawen ken saanen a pulos a nagpakpakita iti barangayda agpapan ita a gundaway.
Maipalagip a namin-adu a daras a nagturong ti Bombo Radyo Laoag News Team iti Barangay Hall ti Barangay Quiling Sur iti siudad ti Batac gapu iti maipagarup a sobra ti kiniddaw a pundo ti Kapitan para iti solar lights project.
