LAOAG CITY – Linawlawagan ni Barangay Chairwoman Ma. Louisa Pascua iti Barangay Nagbacalan iti ili ti Paoay dagiti reklamo a naidanun ditoy Bombo Radyo kontra kenkuana.
Daytoy ket mainaig ti maipagarop a kaadda ti 15 a kabarangayan da a nainayun kadagiti benipisyaryo ti Special Amelioration Program (SAP) nga adda ti mabalin na, ngem naiget a naglikudan daytoy ti kapitana.
Inadmitir ni Pascua nga adda ti maysa a nairaman iti listaan dagiti benepisyaryo ti SAP nga adda iti Amerika ti anak na.
Nupay kasta, inkalintegan ti kapitana a ti adda idiay abroad ket ado dagiti annak na a tartaraknen ti ina na a benepisyaryo ti SAP ken agpapaagas pay ti baket.
Inpakaammo pay ni Pascua a ti maibagbaga nga agub-ubra iti Fort Ilocandia a benepisyaryo ti SAP ket awan ti kinapudno na.
Kabayatanna, naglikudan ti kapitana ti alegasyon a saan da a nagsursur a nagibunong ti form para iti SAP.
Inpasingked na a sinursur da dagiti balbalay ngem inadmitir na a gapu iti kinalawa ti barangay da ket saanda pay a nabunungan amin.
Inkari na nga ituloy da ti agibunong ti form kadagiti saan pay a naikkan iti barangay da.
