LAOAG CITY – Naglikudan ni Barangay Chairwoman Erlinda Foster iti Barangay Pila ditoy ciudad ti Laoag nga agpabpabayad isuna ti Certificate of Acceptance para kadagiti LSI wenno ROF.
Segun kenni Foster, awan pulos ti siningir na a kabarangayan na para iti Certificate of Acceptance.
Kinarit ti kapitan ti nagreklamo a mangidatag ti ebidensya a nagsingir isuna para iti nasao a sertpikasyon.
Ummuna iti daytoy, adda ti dimmanon nga impormasyon ditoy Bombo Radyo Laoag nga adda dagiti sumagmamano nga indibidual ti maipagarop a siningir ti barangay para iti daytoy.
Basar iti pannakisarsarita ti Bombo Radyo iti maysa nga ina ti LSI, napan nangala ti sertipikasyon iti barangay hall ken ni Kapitan Foster a mismo ti nangiyawat kenkuana.
Inlawlawag na nga idi sinaludsod na no mano ti bayadan na ket “lima” ti inbatad ni kapitan Foster rason nga inyawat na ti lima a pisos ngem saan na a ninamnama a lima gasot a pisos ti maipagarop a dadawaten ti kapitan ken rumrumuar nga insawang ti opisyal ti “pagabrutan daka”.
Kabayatanna, kuna ni Mrs. Janet Duarte, ti Local Government Operations Officer ditoy ciudad ti Laoag a ti libre a maited ket ti pass slip no adda ti lugar iti babaen ti MECQ.
Inbatad na a desisyon ti barangay no ited da a libre wenno saan ti Certificate of Acceptance.
Nupay kasta, inpetteng ni Duarte a masapol nga adda ti ordinansa a pagibasaran iti barangay ken resibo tapno masigurado a ti kwarta a masingir ket mapan met laeng iti pondo ti barangay.
