LAOAG CITY – Inlawlawag ni Barangay Chairwoman Norma Bayudan iti Barangay Santiago iti ili ti Marcos a saan a covid ti nakatayan ti kabarangayan na.
Segun kenni Bayudan, saan a naggurigor wenno nagtrangkaso ti indibidwal a pimmusay a kas iti ummuna nga impormasyon a naipadanon ditoy Bombo Radyo.
Inbatad na nga idi Nobyembre 27, napan nangruot ngem gapo ta nagulaw ket nagawid iti pagtaengan da ken ditoy a nagid-idda.
Kunana a kalpasan daytoy ket napan nagpatalado iti maysa a manggagas ken naibaga a nakadalapos daytoy ken adda ti naibaga nga aramiden da ken nalaingan met daytoy.
Kinumpirmaran na a kellaat ti pannakatay ti nasao nga indibidwal gapo ta idi ibaga ti kabbalay na a mapan agpacheck up ngem inpetteng na a nalaingen daytoy.
Naamoan a sakbay ti panagulaw ti lalaki ket awan met ti ammo ti kapitan a sakit na.
Mainaig iti daytoy, kuna ni Bayudan nga ur-urayen da pay laeng ti death certificate ti nasao a pimmusay tapno maamoan no anya ti rason ti nakatayan ti maseknan.
