LAOAG CITY – Naglikudan ni Brgy. Chairman Benjamin Galiza iti Brgy. 10 iti ili ti Bacarra ti alegasyon a maipagarup nga adda dagiti opisyal pakairamanan ti sekretarya ken treasurer a nairaman kas benepisyaryo ti Tulong Panghanapbuhay Para sa Ating Displaced at Disadvantaged Workers (TUPAD).
Segun ken ni Galiza, naarisit a naimbag dagiti nagbalin a benepisyaryo ken dagiti agkasapulan ti kangrunaan a natulongan.
Inpetteng na a ti mismo DOLE ken ti PESO iti nadakamat nga ili ti nangarisit kadagiti nagbalin a benepisyaryo nu pay ti barangay ti naggapoan ti listaan.
Immunan nga inpakaammo ni Galiza nga awan ti nagan ti sekretarya ken daytoy laeng ti nangmonitor iti attendance dagiti benepisyaryo no agdalus dagitoy.
Innayun na a nu bilang adda dagiti benepisyaryo a nairaman ket saan nga isu ti nagpili ngem ketdi dagitoy ti immasideg nga agpatulong iti mismo a maseknan a departamento a mangiyim-implimentar iti nasao a programa.
