LAOAG CITY – Inistorya ni Barangay Chairman Jericho dela Rosa iti Barangay 21 ditoy ciudad ti Laoag ti sibubukel a pasamak iti barangay da iti oras ti alas-8:30 idi rabii.
Inbaga na a kabayatan ti panagsursursur da ket nakita da ti panaggiinon iti ruwar dagiti ado nga agkasera iti maysa a pagkaseraan iti sector 6 iti nasao a barangay.
Iti panangsita da kadagitoy ket nagtataray da a napan iti likud ti kasera da.
Inbatad ti kapitan nga intultuloy da ti nagsursur iti barangay da ngem iti panagsubli da ket nakita da manen dagiti agkaskasera nga aggiinom iti ruwar.
Inlawlawag na nga iti panangsita da manen kadagitoy ket nagtataray da a nagpalikud idinto nga isuda ket napan da metten iti barangay hall.
Kalpasan ti dua nga oras ket nagsubli manen ti grupo ti kapitan iti nasap a pagkaseraan ket ditoy a nakita da manen nga aggiinom dagiti agkaskasera iti ruwar isut gapu na a saanen a nalapdan ni dela Rosa ti pungtot na ket napagsasawan na dagitoy.
Nupay kasta, imbes nga agparbeng dagiti aggiinom ket kumarit da pay isut gapuna nga inreport nan dagitoy iti PNP.
Kinumpirmaran ti kapitan a maysa kadagiti natiliw nga agkaskasera ket naka-probation ken ita nga aldaw ket mapan na kitaen ti kaso ti maseknan iti Parole and Probation Office.
Binabalaw pay ti kapitan ti Landlord ti nasao a kasera gapu ta saanna nga inpudno ti bilang dagiti agkaskasera, ken naamoan da laeng nga ado da idi napanda dimmawat ti ayuda.
Gapu iti daytoy, kayat na a paserraan ti nasao a kasera ken papanawen dagiti agkaskasera iti barangay da gapu ta ibilang na nga awan ti respeto da kadakuada a mismo a bumarangay.
Innayon na a no adda ti agpasken a karruba dagiti agkasera ket sabayan da ken no mapan agronda dagiti barangay tanud ket maipagarop a karkariten dagiti maseknan.
Immun-una iti daytoy, iti palawag ti maysa nga agkasera a naka-probation a ni Cedric Planta, agtawen ti 26 iti Bombo Radyo Laoag, inbaga na a simreken ti ama na a nakiinom idi inanawa dagiti opisyal ti barangay ngem nagpaluto laeng ti midnight snack da iti asawa na, ngem naiget a kinontra daytoy ni Kapitan dela Rosa.
