LAOAG CITY – Maluksaw ni Barangay Chairwoman Nelia Cudal iti Barangay 7 San Pedro II iti ili ti Bacarra no apay nga adda ti dumanondanon a report seknan iti maipagarop nga adda ti pamilya ti nagpositibo ti mailanglangi.
Segun kenni Cudal, awan ti kinapudno na a mabuteng da a mapan mangipan ti ayuda iti pamilya a nagpositibo iti covid-19 a kabrangayan da.
Inpetteng na a sipud adda nagpositibo iti barangay da ket aktibo da a mapan mangip-ipan ti ayuda para kadagitoy.
Kunana pay a gapo iti bannog na iti dayta nga aldaw ket adda ti binilin na a mangipan ti ayuda iti tugaw nga addaw iti sango ti pagtaengan ti nasao a pamilya.
Sungbat daytoy ti kapitan kalpasan nga adda ti dimmanon a report ditoy Bombo Radyo mainaig iti pannakailanglangi ti pamilya a nagpositibo iti virus.
Kabayatanna, inpetteng ni Cudal a saan a pudno ng adda ti maysa a miembro ti pamilya ti nagpositibo nga agwarang-warang gapo ta adda da met a nakabantay, makita da amin a rumuar ken adda ti barikada a naipan.
Inadmitir met ni Cudal nga iti napalabas a lawas ket adda ti naglibas ke napan iti sabali a barangay ngem dagus na met laeng nga inpaala babaen kadagiti kameng ti PNP.
Kunana a dagiti maseknan a pamilya ket dimmalan iti swab test idi Biyernes ken dagitoy ti naudi a nagpositibo iti barangay da.
Innayon na nga iyuray da ti resulta dagiti dimmalan iti swab test idi kalman tapno ammo da ti sumaruno nga addang nga aramiden da.
