LAOAG CITY – Inlawlawag ni Brgy. Chairman Francisco Rambaud iti Brgy. Atlam iti ili ti Nueva Era ti panaghome-quarantine dagiti walo a construction workers a kabarangayanna ken sumagmamano kadagitoy ti nagpositibo iti covid-19.
Segun ken ni Rambaud, saan na nga ammo a napan nagubra dagiti kabaragayanna idiay Magsingal, Ilocos Sur.
Inlawlawagna a ti inpakaamo dagiti maseknan a pagubraan da ket iti ili ti Badoc.
Innayun na a negatibo ti inpresentar nga antigen result dagitoy isut gapu na nga home quarantine ti nairekomendar a surutenda.
Kabayatanna, kuna ni Rambaud a kalpasan ti sumagmamano nga aldaw a panaghome-quarantine dagiti maseknan ket dita laeng a naamoanna ti positibo a resulta ti swab test dagitoy ken naggapo iti Ilocos Sur nu sadino a manipod kadagiti walo a napan nagtrabaho iti nasao a probinsya ket tallo dagiti nagpositibo.
Gapu iti daytoy, kuna na a kinasapulan met a dumalan ti swab testing dagiti pamilya ken primary contacts dagiti nagpositibo.
Kalpasan a rimuar ti resulta ket innem ti nadeterminar a nainayun a positibo iti virus.
Immuna iti daytoy, pabpabasolen dagiti residente iti Brgy. Atlam ti kapitan iti panagwaras ti covid-19 iti nasao a lugar gapu iti nasao a panaghome-quarantine da iti laksid a naggapo dagitoy iti ruar ti probinsya partikular idiay Magsingal, Ilocos Sur.
