LAOAG CITY – Inlawlawag ni Barangay Chairman Rey Ventura iti Barangay Dariwdiw iti ciudad ti Batac nga awan pay ti dimmanon kenkuana a report mainaig iti panagpositive dagiti napan nagdeliver iti pagtaengan da idi pinalubusan na dagiti dua a trabahador na a nagturong idiay Cagayan.
Segun kenni Ventura, adda ti napan nagdeliver kadakuada a taga Taguig City ken idi agsubli da iti lugar da ket dimmalan dagitoy iti antigen test iti border control iti ili ti Badoc ken maysa kadagitoy ket positive.
Inbatad na a gapo ta awan met ti dimmanon kenkuana mainaig iti daytoy ket pinalubusan na a napan idiay Cagayan iti bigat ti Biyernes dagiti dua a trabahador na tapno mapan agideliver.
Kunana a naamoan na laeng a positive ti maysa kadagiti napan nagdeliver iti pagtaengan na iti rabii ti Biyernes no sadinno a nakapanawen dagiti trabahador na.
Kalpasan a naipadanon kenkuana daytoy, dagus na nga in-quarantine dagiti nakapulapol ken dimmalan da iti swab test ken idi positibo ti resulta ket dagus met nga innala ti CHO.
